Psali Adam :: Ⲁⲓϯϩⲟ ⲉ̀ⲡⲉⲕϩⲟ :: إبصالية أدآم

Font:

Ⲁⲓϯϩⲟ ⲉ̀ⲡⲉⲕϩⲟ: ⲉ̀ⲃⲟⲗ ϧⲉⲛ ⲡⲁϩⲏⲧ ⲧⲏⲣϥ: ⲥⲱⲧⲉⲙ ⲉ̀ⲡⲁϯϩⲟ: Ⲡⲟ̅ⲥ̅ ⲙ̀ⲡⲓⲉ̀ⲡ̀ⲧⲏⲣϥ.
Ⲃⲱⲣⲡ ⲉ̀ⲃⲟⲗ ϧⲉⲛ ⲡ̀ϭⲓⲥⲓ: ⲛⲏⲓ ⲛ̀ⲧⲉⲕⲃⲟⲏ̀ⲗⲓⲁ̀: ϩⲓⲛⲁ ⲛ̀ⲧⲁϭⲓⲥⲓ: ⲛ̀ⲑⲏⲉ̀ⲑⲟⲩⲁⲃ Ⲙⲁⲣⲓⲁ̀.

+ Ⲇⲁⲩⲓⲇ ⲅⲁⲣ ⲁϥⲥⲁϫⲓ: ϧⲉⲛ ⲡ̀ⲭⲱⲙ ⲛ̀ⲧⲉ ⲛⲓⲯⲁⲗⲙⲟⲥ: ⲛ̀ϩⲁⲛⲗⲉⲝⲓⲥ ⲉⲣⲡ̀ⲣⲉⲡⲓ: ⲛ̀ϯⲡⲁⲣⲑⲉⲛⲟⲥ.
+ Ⲉⲩⲥⲁϫⲓ ⲉⲑⲃⲏϯ: ⲛ̀ϩⲁⲛϩ̀ⲃⲏⲟⲩⲓ̀ ⲉⲩⲧⲁⲓⲏ̀ⲟⲩⲧ: ϯⲃⲁⲕⲓ ⲛ̀ⲧⲉ Ⲫϯ: ⲡⲓⲧⲱⲟⲩ ⲉⲧⲕⲉⲛⲓⲱ̀ⲟⲩⲧ.

Ⲍⲁⲭⲁⲣⲓⲁⲥ ⲇⲉ ⲟⲛ: ϧⲉⲛ ⲧⲉϥⲡ̀ⲣⲟⲫⲏⲧⲓⲁ̀: ⲁϥⲧⲁⲙⲉ ⲉ̀ⲣⲟⲛ: ϫⲉ ⲑⲁⲓ ⲧⲓ ϯⲗⲩⲭⲛⲓⲁ̀.
Ⲏ̀ⲥⲁⲏ̀ⲁⲥ ⲡⲓⲥⲟⲫⲟⲥ: ϧⲉⲛ ⲛⲓⲡ̀ⲣⲟⲃⲏⲧⲏⲥ: ⲡⲓⲑⲉⲟⲥⲉⲃⲏⲥ: ⲛ̀ⲁ̀ⲅⲱⲛⲓⲥⲧⲏⲥ.

+ Ⲑⲁⲓ ⲧⲉ ϯⲡⲁⲣⲑⲉⲛⲟⲥ: ϧⲉⲛ ⲛⲉⲛϣⲉⲣⲓ ⲙ̀ⲡⲓⲥ̅ⲗ̅: ⲁⲥⲙⲓⲥⲓ ⲁ̀ⲏⲗⲑⲱⲥ: ⲛ̀Ⲉⲙⲙⲁⲛⲟⲩⲏⲗ.
+ Ⲓⲥ ⲛⲓⲡ̀ⲣⲟⲫⲏⲧⲏⲥ: ⲁⲩⲥⲁϫⲓ ⲧⲏⲣⲟⲩ ⲉⲑⲃⲏⲧⲥ: ϫⲉ ⲡⲓⲇⲉⲥⲟⲡⲧⲏⲥ: ⲁϥϭⲓⲥⲁⲣⲝ ⲛ̀ϧⲏⲧⲥ.

Ⲕⲉ ⲅⲁⲣ ⲁⲩⲉⲣⲙⲉⲑⲣⲉ: ⲛ̀ϫⲉ ⲛⲓⲁ̀ⲡⲟⲥⲧⲟⲗⲟⲥ: ϫⲉ ϧⲉⲛ ⲓ̅ⲋ ⲙ̀ⲙⲉⲥⲱⲣⲏ: ⲁⲩⲱ̀ⲗⲓⲙ̀ⲙⲟⲥ.
Ⲗⲟⲓⲡⲟⲛ ⲁⲩⲧⲁⲙⲟⲛ: ϫⲉ ⲛⲁⲩⲭⲱ ⲙ̀ⲡⲉⲥⲥⲱⲙⲁ: ϧⲉⲛ ⲡⲉⲥⲥ̀ⲡⲏⲗⲉⲟⲛ: ⲕⲁⲧⲁ ⲡ̀ϭ̀ⲱⲣⲉⲙ ⲙ̀ⲡⲓⲡ̅ⲛ̅ⲁ̅.

+ Ⲙⲉⲛⲉⲛⲥⲁ ⲡⲉⲥⲉⲛⲕⲟⲧ: ϧⲉⲛ ⲓ̅ⲋ ⲛ̀ⲉ̀ϩⲟⲟⲩ: ⲛⲉⲙ ⲋ ⲛ̀ⲁⲃⲟⲧ: ⲙ̀ⲫ̀ⲣⲏϯ ⲉ̀ⲧⲁⲩⲧⲁⲙⲱⲟⲩ.
+ Ⲛⲁⲩⲑⲱⲟⲩϯ ϩⲓⲟⲩⲙⲁ: ⲛ̀ϫⲉ ⲛⲓⲁ̀ⲡⲟⲥⲧⲟⲗⲟⲥ: ⲁⲩⲁ̀ⲣⲉϩ ⲉ̀ⲡⲓⲥⲱⲙⲁ: ⲛ̀ⲥ̀ⲡⲟⲩⲇⲉⲟⲥ.

Ⲝⲁⲡⲓⲛⲁ Ⲑⲱⲙⲁⲥ: ⲛⲁϥⲓ̀ⲣⲓ ϧⲉⲛ ⲧⲉϥⲭⲱⲣⲁ: ⲁϥϫⲓⲙⲓ ⲛ̀ⲛⲓⲁⲅⲅⲉⲗⲟⲥ: ⲉⲩⲱ̀ⲗⲓ ⲙ̀ⲡⲓⲥⲱⲙⲁⲭ
Ⲟⲩⲟϩ ⲛⲁⲩⲉⲣⲯⲁⲗⲓⲛ: ⲛⲁⲩϯⲱ̀ⲟⲩ ⲙ̀ⲡⲉϥⲙ̀ⲑⲟ: ϧⲉⲛ ⲟⲩⲙⲉⲧⲁⲧⲕⲁⲕⲓⲛ: ϣⲁ ⲟⲩⲏⲓ ⲙ̀ⲡ̀ⲟⲩⲣⲟ.

+ Ⲡⲁⲗⲓⲛ ⲟⲛ ⲁϥⲓ̀: ⲛ̀ϫⲉ Ⲇⲓⲇⲩⲙⲟⲥ: ϣⲁ ⲧ̀ⲅⲉⲑⲥⲉⲙⲁⲛⲓ: ⲁϥϫⲟⲥ ⲛ̀ⲛⲓⲁ̀ⲡⲟⲥⲧⲟⲗⲟⲥ.
+ Ⲣⲁϣⲓ ⲱ̀ ⲛⲓⲥ̀ⲛⲏⲟⲩ: ⲙⲁⲧⲁⲙⲟⲓ ⲉ̀ϯⲡⲁⲣⲑⲉⲛⲟⲥ: ⲓⲥϫⲉⲛ ⲁⲥϫⲱⲕ ⲙ̀ⲡⲉⲥⲥⲏⲟⲩ: ⲟⲩⲟϩ ⲁⲥⲙ̀ⲧⲟⲛⲙ̀ⲙⲟⲥ.

Ⲥⲉ ⲟⲛⲧⲱⲥ ⲁⲩⲧⲱⲟⲩⲛⲟⲩ: ⲁⲩⲟⲩⲱⲛ ⲙ̀ⲡⲓⲙⲁ: ⲁⲩⲓ̀ ⲉ̀ϧⲟⲩⲛ ⲧⲏⲣⲟⲩ: ⲙ̀ⲡⲟⲩϫⲓⲙⲓ ⲙ̀ⲡⲓⲥⲱⲙⲁ.
Ⲧⲟⲧⲉ ⲁⲩⲣⲓⲙⲓ ϩⲱⲟⲩ: ⲉ̀ϫⲉⲛ ⲫⲏⲉ̀ⲧⲁⲩϣⲱⲡⲓ: ⲛ̀ⲑⲟϥ ⲇⲉ ⲡⲉϫⲁϥ ⲛⲱⲟⲩ: ϫⲉ ⲛⲁⲥ̀ⲛⲏⲟⲩ ⲙ̀ⲡⲉⲣⲛⲉϩⲡⲓ.

+ Ⲩⲥ ϩⲏⲡⲡⲉ ⲁⲓϫⲓⲙⲓ: ⲙ̀ⲡ̀ⲥⲱⲙⲁ ⲛ̀ⲧⲁⲟ̅ⲥ̅: ⲛ̀ⲑⲱⲟⲩ ⲇⲉ ⲁⲩⲣⲁϣⲓ: ϧⲉⲛ ⲡⲓϩ̀ⲙⲟⲧ ⲛ̀ⲧⲉ Ⲡⲟ̅ⲥ̅.
+ Ⲫ̀ⲧⲟⲙⲓ ⲅⲁⲣ ⲉ̀ⲣⲟⲛ: ⲉⲑⲣⲉⲛⲓ̀ⲣⲓ ⲙ̀ⲡⲉⲥϣⲁⲓ: ⲛ̀ⲧⲉⲛⲱϣ ⲉ̀ⲃⲟⲗ ϧⲉⲛ ⲣⲱⲛ: ϣⲁ ⲑ̀ⲙⲁⲩ ⲙ̀ⲡⲓⲛⲁⲓ.

Ⲭⲉⲣⲉ ϯⲁ̀ⲛⲁⲗⲩⲙⲯⲓⲥ: ⲛ̀ⲧϭ̀ⲣⲟⲙⲡⲓ ⲉⲑⲛⲉⲥⲱⲥ: ⲉ̀ⲧⲁϥⲟⲩⲱⲛϩⲥ ⲁϭⲛⲉ ⲥⲁⲛⲓⲥ: ⲛ̀ϫⲉ Ⲇⲓⲇⲩⲙⲟⲥ.
Ⲯⲱⲧⲏⲣ ⲙ̀ⲡⲓⲕⲟⲥⲙⲟⲥ: ϧⲉⲛ ⲧⲉⲥⲡⲁⲣⲣⲏⲥⲓⲁ̀: ⲛⲟϩⲉⲙ ⲙ̀ⲡⲉⲕⲗⲁⲟⲥ: ⲛⲉⲙ ⲧⲉⲕⲉⲕⲕ̀ⲗⲏⲥⲓⲁ̀.

+ Ⲱ̀ⲟⲩⲛ̀ϩⲏⲧ ⲱ̀ ⲡⲓⲙⲁⲓⲣⲱⲙⲓ: ⲉ̀ϫⲉⲛ ⲡⲓⲉ̀ⲗⲁⲭⲓⲥⲧⲟⲥ: ⲉⲑⲃⲉ ⲡⲓⲉⲣⲫ̀ⲙⲉⲩⲓ̀: ⲛ̀ϯⲑⲉⲟⲧⲟⲕⲟⲥ.