A fourth Psali Adam for Annunciation :: Ⲁⲇⲁⲙ ⲡⲓϣⲟⲣⲡ ⲛ̀ⲓⲱⲧ

Ⲁⲇⲁⲙ ⲡⲓϣⲟⲣⲡ ⲛ̀ⲓⲱⲧ: ⲁϥⲣⲁϣⲓ ⲉ̀ⲙⲁϣⲱ: ϫⲉ ⲉ̀ⲃⲟⲗϩⲓⲧⲉⲛ ⲧⲉϥϣⲉⲣⲓ: Ⲙⲁⲣⲓⲁ̀ ϯⲟⲩⲣⲱ.
Ⲃⲟⲛ ⲟⲩⲛⲓϣϯ ⲛ̀ⲣⲁϣⲓ: ⲁϥϣⲱⲡⲓ ⲙ̀ⲡⲉⲛⲅⲉⲛⲟⲥ: ϩⲓⲧⲉⲛ ⲡⲓϫⲓⲛⲙⲓⲥⲓ: Ⲙⲁⲣⲓⲁ̀ ϯⲡⲁⲣⲑⲉⲛⲟⲥ.

Ⲅⲁⲃⲣⲓⲏⲗ ⲡⲉϫⲁϥ: ⲉ̀ⲧⲁϥⲓ̀ ϣⲁⲣⲟⲥ: ϫⲉ ⲭⲉⲣⲉ ⲑⲏⲉⲑⲙⲉϩ ⲛ̀ϩ̀ⲙⲟⲧ: ϫⲉ ⲁ̀Ⲡⲟ̅ⲥ̅ ⲥⲱⲧⲡ ⲙ̀ⲙⲟ.
Ⲇⲁⲩⲓⲇ ⲡⲓⲡ̀ⲣⲟⲫⲏⲧⲏⲥ: ⲁϥⲙⲟⲩϯ ⲉ̀ⲣⲟⲥ: ϫⲉ ϯⲃⲁⲕⲓ ⲉ̅ⲑ̅ⲩ̅: ⲛ̀ⲧⲉ ⲡⲓⲛⲓϣϯ ⲛ̀ⲟⲩⲣⲟ.

Ⲉⲑⲃⲉ ⲡⲁⲣⲁⲃⲁⲥⲓⲥ: ⲛ̀ⲧⲉ Ⲁ̀ⲇⲁⲙ ⲛⲉⲙ Ⲉ̀ⲩⲁ: ⲁϥⲁ̀ϣⲁⲓ ⲛ̀ϫⲉ ⲫ̀ⲛⲟⲃⲓ: ϧⲉⲛ ⲟⲩⲙⲉⲧϩⲟⲩⲟ̀.
Ⲍⲁⲭⲁⲣⲓⲁⲥ ⲁϥϫⲟⲥ: ϧⲉⲛ ⲧⲉϥⲡ̀ⲣⲟⲫⲏⲧⲓⲁ̀: ⲁϥⲧⲁⲙⲟⲛ ⲙ̀ⲡⲓⲧⲁⲓⲟ̀: ⲛ̀ⲑⲏⲉ̅ⲑ̅ⲩ̅ Ⲙⲁⲣⲓⲁ̀.

Ⲏⲥⲁⲏ̀ⲁⲥ ⲡⲓⲡ̀ⲣⲟⲫⲏⲧⲏⲥ: ⲁϥⲉⲣⲙⲉⲑⲣⲉ ⲉⲑⲃⲏϯ: ϫⲉ ⲓⲥ ϯⲡⲁⲣⲑⲉⲛⲟⲥ: ϩⲏⲡⲡⲉ ⲥⲉⲛⲁⲉ̀ⲣⲃⲟⲕⲓ.
Ⲑⲁⲓ ⲧⲉ ⲑ̀ⲙⲁⲩ ⲙ̀Ⲫϯ: ⲉ̀ⲧⲁϥⲓ̀ ⲉⲑⲃⲉ ⲡⲉⲛⲥⲱϯ: Ⲙⲁⲣⲓⲁ̀ ϯⲡⲁⲣⲑⲉⲛⲟⲥ: ϯⲫⲉ ⲙ̀ⲙⲁϩⲃ̅ϯ.

Ⲓⲉⲍⲉⲕⲓⲏⲗ ⲁϥⲛⲁⲩ: ⲉ̀ⲟⲩⲙⲩⲥⲧⲏⲣⲓⲟⲛ: ⲟⲩⲙⲏⲓⲛⲓ ⲉ̀ⲡ̀ϫⲓⲛⲙⲓⲥⲓ: ⲙ̀ⲡⲁⲣⲑⲉⲛⲓⲕⲟⲛ.
Ⲕⲁⲧⲁ ⲡ̀ⲥⲁϫⲓ ⲛ̀Ⲓⲉⲍⲉⲕⲓⲏⲗ: ⲛⲉⲙ ⲧⲉϥⲡ̀ⲣⲟⲫⲏⲧⲓⲁ̀: ϫⲉ ⲙ̀ⲡⲉⲥⲃⲱⲗ ⲉ̀ⲃⲟⲗ: ⲛ̀ϫⲉ ⲧⲉⲥⲡⲁⲣⲑⲉⲛⲓⲁ̀.

Ⲗⲁⲥ ⲛⲓⲃⲉⲛ ⲉⲧϣⲱⲡ: ϩⲓϫⲉⲛ ⲡ̀ⲕⲁϩⲓ ⲧⲏⲣϥ: ⲥⲉϯⲱ̀ⲟⲩ ⲙ̀ⲡⲉϣⲏⲣⲓ: Ⲫϯ ⲙ̀ⲡⲓⲉ̀ⲡ̀ⲧⲏⲣϥ.
Ⲙⲁⲣⲉⲛϯⲱ̀ⲟⲩ ⲛⲉ: ⲱ̀ ϯⲑⲉⲟ̀ⲧⲟⲕⲟⲥ: ϫⲉ ⲁ̀ⲣⲉϥⲁⲓ ϧⲉⲛ ⲧⲉⲛⲉϫⲓ: ⲙ̀ⲡⲓⲁ̀ⲭⲱⲣⲓⲧⲟⲥ.

Ⲛⲓⲙ ⲅⲁⲣ ϧⲉⲛ ⲛⲓⲣⲱⲙⲓ: ⲛⲉⲙ ⲛⲓⲁⲅⲅⲉⲗⲟⲥ: ⲉⲑⲛⲁϣ̀ϫⲱ ⲙ̀ⲡ̀ⲧⲁⲓⲟ̀: ⲙ̀Ⲙⲁⲣⲓⲁ̀ ϯⲡⲁⲣⲑⲉⲛⲟⲥ.
Ⲝⲩⲗⲟⲛ ⲅⲁⲣ ⲍⲱⲛⲧ: ⲛ̀ⲑⲟϥ ϧⲉⲛ ⲟⲩⲙⲉⲑⲙⲏⲓ: ⲡ̀ⲟⲩⲧⲁϩ ⲛ̀ⲧⲉⲛⲉϫⲓ: ⲱ̀ ϯⲃⲱ ⲛ̀ⲁ̀ⲗⲟⲗⲓ.

Ⲟⲩⲛⲁⲓ ⲛⲉⲙ ⲟⲩⲟⲩⲛⲟϥ: ⲙ̀ⲙⲏⲓ ϧⲉⲛ ⲟⲩⲙⲉⲑⲙⲏⲓ: ⲁϥϣⲱⲡⲓ ⲛⲉⲙⲁⲛ ⲉⲑⲃⲏϯ: ⲱ̀ ϯϣⲉⲗⲉⲧ ⲙ̀ⲙⲏⲓ.
Ⲡⲓⲧⲱⲟⲩ ⲛ̀ⲧⲉ Ⲫϯ: ⲡⲓⲧⲱⲟⲩ ⲉⲧⲕⲉⲛⲓⲱ̀ⲟⲩⲧ: ϫⲉ ⲁⲩⲥⲁϫⲓ ⲉⲑⲃⲏϯ: ⲛ̀ϩⲁⲛϩ̀ⲃⲏⲟⲩⲓ̀ ⲉⲩⲧⲁⲓⲏ̀ⲟⲩⲧ.

Ⲣⲁϣⲓ ⲟⲩⲟϩ ⲑⲉⲗⲏⲗ: ⲛⲁⲕ ⲱ̀ Ⲡⲓ̅ⲥ̅ⲗ̅: ϫⲉ Ⲙⲁⲣⲓⲁ̀ ⲧⲉⲕϣⲉⲣⲓ: ⲁⲥⲙⲓⲥⲓ ⲛ̀Ⲉⲙⲙⲁⲛⲟⲩⲏⲗ.
Ⲥⲱⲧⲉⲙ ⲧⲁϣⲉⲣⲓ ⲁ̀ⲛⲁⲩ: ⲡⲉϫⲉ Ⲇⲁⲩⲓⲇ ⲡⲉⲛⲓⲱⲧ: ⲁ̀ⲣⲓⲡ̀ⲱⲃϣ ⲙ̀ⲡⲉⲗⲁⲟⲥ: ⲛⲉⲙ ⲡ̀ⲏⲓ ⲛ̀ⲧⲉ ⲡⲉⲓⲱⲧ.

Ⲧⲉⲥ̀ⲙⲁⲣⲱⲟⲩⲧ ⲛ̀ⲑⲟ: ⲛ̀ϩ̀ⲣⲏⲓ ϧⲉⲛ ⲛⲓϩⲓⲟ̀ⲙⲓ: ϫⲉ ⲁ̀ⲣⲉϣⲱⲡⲓ ⲙ̀ⲙⲁⲩ: ⲙ̀Ⲫϯ ⲡⲓⲙⲁⲓⲣⲱⲙⲓ.
Ⲩⲡⲉⲣ ⲛ̀ⲧⲟⲩⲃⲟ: ⲛ̀ⲛⲉ ⲉⲥⲑⲉⲥⲓⲥ: ⲁ̀ⲣⲉϣⲱⲡⲓ ⲛ̀ⲟⲩⲑ̀ⲣⲟⲛⲟⲥ: ⲙ̀ⲡⲓⲙⲟⲛⲟⲅⲉⲛⲏⲥ.

Ⲫ̀ⲟⲩⲱⲓⲛⲓ ⲙ̀ⲡⲉϣⲏⲣⲓ: ⲁϥⲉⲣⲟⲩⲱⲓⲛⲓ ⲉ̀ⲣⲟⲛ: ⲟⲩⲟϩ ⲡⲉϥⲛⲓϣϯ ⲛ̀ⲱ̀ⲟⲩ: ⲁϥϣⲁⲓ ⲉ̀ϩ̀ⲣⲏⲓ ⲉ̀ϫⲱⲛ.
Ⲭⲉⲣⲉ ϯⲥ̀ⲕⲩⲛⲏ: ⲉ̅ⲑ̅ⲩ̅ ⲛ̀ⲕⲁⲑⲁⲣⲟⲥ: ⲉ̀ⲧⲁϥϣⲱⲡⲓ ⲛ̀ϧⲏⲧⲥ: ⲛ̀ϫⲉ Ⲫϯ ⲡⲓⲗⲟⲅⲟⲥ.

Ⲯⲩⲭⲏ ⲛⲓⲃⲉⲛ ⲣⲁϣⲓ: ⲛ̀ⲟⲩⲣⲁϣⲓ ⲛ̀ⲁⲧⲕⲓⲙ: ⲉⲑⲃⲉ ϯⲡⲁⲣⲑⲉⲛⲟⲥ Ⲙⲁⲣⲓⲁ̀: ⲧ̀ϣⲉⲣⲓ ⲛ̀Ⲓⲱⲁⲕⲓⲙ.
Ⲱⲟⲩⲛⲓⲁ̀ϯ ⲛ̀ⲑⲟ: Ⲙⲁⲣⲓⲁ̀ ϯⲡⲁⲣⲑⲉⲛⲟⲥ: ϫⲉ ⲁⲥⲙⲓⲥⲓ ⲛⲁⲛ: ⲙ̀Ⲫϯ ⲡⲓⲖⲟⲅⲟⲥ.